. .
...
السبت 21 أبريل 2018 راسلنا | القائمة البريدية | سجل الزوار | خريطة الموقع


جديد المقالات
جديد الأخبار
جديد الفيديو


جديد الصوتيات

تغذيات RSS

المتواجدون الآن


Propellerads
المقالات
مكتبة مقالات الحوش السوداني
عاوز ليهو كرتونة
...
عاوز ليهو كرتونة
12-12-2017 09:32





عاوز ليهو كرتونة

الفاتح جبرا


من الأخبار (العجيبة) بالفعل ، خبرا أوره موقع (الراكوبة) الأليكتروني مؤخراً يقول : علمت ” الراكوبة” من مصدر موثوق ضبط خمور بلدية بحوزة المدير الفني بالمجلس الوطني في مكتبه بمباني البرلمان الاسبوع المنصرم .
و أكد المصدر ان سلطات الأمن بالبرلمان ظلت تراقب هذا الموظف منذ مدة الى أن ضبطته داخل مكتبه وبحوزته زجاجتي خمور بلدية (عرقي).

قال المصدر ان أمر محاسبته تأخر نسبة لتواجد رئيس المجلس خارج البلاد الاسبوع المنصرم، موضحاً بأن يوم الخميس الماضي تمت مناقشة الامر في اجتماع الشؤون المجلسية الذي خرج بتشكيل لجنة للتحقيق مع الموظف مطلع الاسبوع المقبل، و لجنة لتقصي الحقائق و كيفية دخول الخمور الى داخل البرلمان (إنتهى الخبر) …….
– طيب يا موظف يااخ وكت عاوز تلطخ سمعة برلمان الدولة الرسالية لطخها بي حاجة عليها القيمة .. ويسكي .. كونياك .. مثلا؟
– (إلى أن ضبطته في مكتبه) ده معناتو بالثابتة .. يعني مفروض من المكتب (للقسم) ورقم بلاغ وشاكي ومعروضات وشهود .. وللا ما كده يا جماعة؟
– (أمر محاسبته تأخر نسبة لتواجد رئيس المجلس خارج البلاد) .. طيب افرضو رئيس المجلس ده ما جاء كلو كلو؟ أو أتاه الأجل المحتوم؟ القصة ح تنتهي وللا شنو؟
– وهل أي موظف يقبضو عندو (خمور) في مكتبو (الناس) بتنتظر رئيسو لمن يجي من السفر؟ ما الشاربين (أنصاص) ديل الصباح بيتجلدو في الأقسام جلد نضيف
– (تشكيل لجنة للتحقيق مع الموظف) … دي كيف يعني؟ إجراء إداري مثلاً؟ يكون الموظف ده قاعد يجي يا ربي متأخر؟ وللا خالف ليهو لوائح مشتروات؟
– وكمان (لجنة لتقصي الحقائق) لمعرفة كيفية دخول الخمور إلى داخل البرلمان؟ أها اللجنة دي فيها ممثل شرطة وللا ح تشتغلو كمان شغل الشرطة وللا الفهم شنووووو؟
– إذا (قزازتين) عرقي بيعملو ليهم (لجنتين أتنين ) بتاعات تحقيق هذا يعني أن (لجنة) تحقيق لكل قزازة ، ودي ممكن نفوتا لو (العرقي) عرقي (حر) لكن كان عرقي (داشر ) .. لجنة واااحدة خسارة فيهو
– بما أنو (الشغل) كولو (شغل مكاتب) وما فيهو شرطة .. السؤال الذي يطرح نفسه (أين تم وضع القزازتين) كمعروضات؟ طيب مش ممكن (الحاوي) يقوم يقلب المعروضات دي (موية)؟ أو القزازتين بدل كانو (فاميلي) يتقلبو (موبايل) ؟
– من المفترض أن تسأل لجان التحقيق هذا الموظف إن كان هنالك بعض النواب يأتون إليه لـ (يبوزو) أثناء الجلسات إذ ما المغزى من تواجد عرقي داخل برلمان ومن هو الجمهور المستهدف؟ !
– وبالمرة (اللجان) دي تستعين بالكلاب البوليسية لتمشيط كل مكان في البرلمان فربما قامت بالعثور على بلاوي وأصناف أخرى من مغيبات العقل ….(من زمان بنقول النواب ديل فيهم ناس كلامهم ماااا ياهو ومااا براهم) !
– إذا كانت (القزازتان) المضبوطتان سعة الواحدة 350 ملي لتر فربما تكونا للإستهلاك الشخصي أم إذا كانتا سعة 1.5 لتر (فاميلي وكده) فالقصة تكون حيازة وترويج .. الحيازة ما مهمة لكن السؤال : الترويج لمنو؟
– العبدلله يعتقد أنه يجب منح وسام (الإنجاز) لست العرقي الذي تم ضبطه بحسبانها أول ست عرقي في العالم تدخل منتجاتها إلى داخل البرلمانات .

كسرة :
غايتو قرار رفع الدعم الجاي ده عاوز ليهو (كرتونة) !
كسرة تحرش : أخبار إنتهاء التحقيقات مع الدبلوماسي المتهم بالتحرش شنووووو؟ .. (و+و+و)
•كسرة جديدة لنج :
أخبار كتب فيتنام يا وزير المالية ووزيرة التربية والتعليم شنو(و+و+و+و) …
• كسرة ثابتة (قديمة) :
أخبار ملف خط هيثرو العند النائب العام شنو (وووووووووووو)+ (وووووووووووو)+ (وووووووووووو)+ (وووووووووووو)+ (وووووووووووو)+ (وووووووووووو)+ (وووووووووووو)+(وووووو)+(و)+و
• كسرة ثابتة (جديدة)
أخبار تنفيذ توجيهات السيد الرئيس بخصوص ملف خط هيثرو شنو (وووووووووووو)+ (وووووووووووو)+ (وووووووووووو)+وووووووووووو)+و+(و)+و

أضف تعليقك على الفيسبوك

تعليقات 0 | إهداء 0 | زيارات 121
.
Propellerads

تعليقات 0 | إهداء 0 | زيارات 121


خدمات المحتوى
  • مواقع النشر :
  • أضف محتوى في Digg
  • أضف محتوى في del.icio.us
  • أضف محتوى في StumbleUpon
  • أضف محتوى في Google


الفاتح جبرا
الفاتح جبرا

تقييم
0.00/10 (0 صوت)